Galaxy Quest (1999)

Þvílík og önnur eins vitleysa. En ólíkt flestum öðrum myndum sem falla í þann flokk er þessi bráðfyndin og flott gerð. Jason Nesmith (Tim Allen) lék á árum áður æðsta mann á geimskipinu Protector í geimmyndaflokknum Galaxy Quest. Því miður var bundinn endi á þættina árið 1982, og síðan þá hefur "áhöfnin" haft það að aðalstarfi að koma fram á ráðstefnum þar sem safnast saman nördar og frík sem lifa sig inn í þáttinn og kunna söguþræðina betur en leikararnir gerðu nokkurn tíma. (Ætli nokkrum detti Star Trek og William Shatner í hug...?) Dag einn birtist undarlegur hópur á einni ráðstefnunni og áður en Nesmith getur sagt "Dr. Spock" er búið að flytja hann í geimskip Thermiu-búanna sem eiga í stríði við ófrýnileg geimskrímsli. Málið er að Thermiu-búarnir halda að Galaxy Quest séu heimildarþættir um hetjudáðir áhafnar skipsins. Að sjálfsögðu lætur Nesmith "geisla" alla áhöfnina upp til sín. Þar mæta Gwen DeMarco (Sigourney Weaver), Alexander Dane (Alan Rickman), Tommy Webber (Daryl Mitchell), Fred Kwon (Tony Shalhoub) og náungi nokkur sem lék í einum þætti en dó fyrir fyrsta auglýsingahlé (Sam Rockwell). Að góðra mynda hætti takast þau á við ýmis verur og hafa sigur í dagslok. Myndin er stórskemmtileg, maður finnur að allir eru að gera góðlátlegt grín að þessari geim-menningu sem þrífst hérlendis á meðal áhangenda þátta á borð við Star Trek og Babylon 5. Tim Allen er bráðgóður og greinilega feginn að losna úr hlutverki handlagna heimilisföðurins. Bestur er samt Alan Rickman í hlutverki fyrrum Shakespeareleikarans sem festist í hlutverki hins alvitra Dr. Lazarus (Leonard Nimoy og Spock??). Leikstjórinn Dean Parisot gerði hina vanmetnu Home Fries fyrir tveimur árum, og maður sér hér af hverju Spielberg treysti honum fyrir þessari. Mjög góð bíóskemmtun.

Ég verð að segja að þessi mynd kom mér svolítið á óvart. Ég hélt að hún yrði full af 5-aura bröndurum en hún var bara ansi fyndin. Skemmtileg hugmynd bakvið þetta, að láta leikara í geimþætti stjórna alvöru geimskipi. Það er alveg ótrúlega fyndið hvað það er gert mikið grín að þessum Star Trek(og því um líkt)- aðdáendum. Ágætis skemmtun.

Loksins! Eftir meira en átta mánuði er Galaxy Quest loksins komin til Íslands. Ég vona bara að The Straight Story fari að koma bráðum og að við förum að fá myndir mun fyrr. ÉG VIL FÁ THE CELL NÚNA! En nóg um það. Galaxy Quest er ein af þessum myndum sem öllum finnst skemmtileg (þ.e. allir með réttu viti). Hún er grínmynd en samt svo miklu meira en það; hún er skemmtun í sínu hreinasta formi. Ég man ekki eftir slíkri mynd síðan ég sá Toy Story 2. Handritið er með ólíkindum skemmtilegt og sniðugt og eru flestir brandararnir á kostnað Star Trek þáttanna. Þeir sem ekki ná öllum bröndurunum eða finnast þeir ekki fyndnir geta samt sem áður skemmt sér yfir ævintýralegri sögu og áhugaverðri atburðarrás svo að enginn ætti að verða fyrir vonbrigðum - nema kannski hörðustu Star Trek aðdáendur sem gætu tekið þessari mynd sem móðgun... Ef finna á galla er hann líklegast sá að fyrsti hálftíminn var frekar veikur - ekki leiðinlegur en alls ekki eins frábær og það sem síðar kemur. Góðar brellur, góður húmor, góður leikur, gott handrit, góð mynd!

Stórskemmtileg og einstaklega fyndin gamanmynd sem segir í stuttu máli frá hóp útbrunninna leikara úr geimþáttum sem eru óhugnalega líkir Star Trek. Þeir fá heimsókn frá alvöru geimverum á ráðstefnu nokkurri, en þessar geimverur hafa verið að horfa á þættinu um árabil, halda að þeir séu "sögulegar heimildir" (þ.e. raunverulegir) og vilja nú fá leikaranaáhöfnina til þess að bjarga því sem er eftir af kynstofni þeirra frá bráðri útrýmingu. Það kom mér alveg sérstaklega á óvart hversu vel myndin virkar fyrir mismunandi fólk. Krakkar munu hafa gaman af brellunum (sem eru mjög góðar) og hasarnum, sci-fi aðdáaendur munu ná bröndurum sem fara fram hjá öðrum og þeir sem hata Star Trek geta hlegið af fáránleikanum í þessu öllu saman. Húmorinn er alveg frábær og mjög sniðugur, persónulega þarf ég að leita aftur til American Pie eða There's Something About Mary til þess að finna mynd sem ég hló jafn mikið af. Mynd sem veldur svo sannarlega ekki vonbrigðum!