The Score (2001)

Frábær mynd. Ég skil ekki hvers vegna mörgum líkaði hana svona illa. Söguþráðurinn er fínn, og leikararnir eru magnaðir. The Score er engin spennumynd og henni er ekki ætlast til að vera spennandi, heldur gengur hún bara út á skipulagningu ránsins. Myndin var samt heldur betur fáranleg í lokin, rétt eftir ránið (sem var frábært). Samræðurnar eru líka stórkoslegar. Ef þú fílar GÓÐA glæpaþrillera, þá skalt þú sjá þessa.

The Score er leikstýrð af Frank Oz og fjallar um Nick Wells, innbrotsþjóf sem er orðin leiður á starfi sínu og vill sinna kærustunni sinni (Angela Bassett) og rekstri jassklúbs sem hann rekur. Max, (Marlon brando) lærimeistari og samstarfsmaður Wells fær hann til að fremja lokarán, fífldjarft innbrot í hús tollgæslunnar í Montreal. Þar hefur Brando komið sér upp samstarfsmanni sem á að aðstoða De Niro við innbrotið, en hann er leikinn af Edward Norton. Með Frank Oz sem leikstjóra, De Niro og Norton í aðalhlutverkum og Marlon Brando og Angelu Bassett í aukahlutverki býst maður við gæðamynd, enda þar á ferðinni miklir fagmenn. Myndin stendur hins vegar ekki undir nafni og dettur niður í meðalmennskuna, og jafnvel niður fyrir það. í myndinni er að finna margar klisjur og vantar frumleika í hana. Það fór sérstaklega í taugarnar á mér þegar ég horfði á þessa mynd því það er svo áberandi. Ef meiri hasar og spenna hefði verið í myndinni hefði þetta ekki skipt eins miklu máli. Málið er bara að myndin byrjar mjög hægt og fyrstu 90 mínúturnar gerist mjög fátt. Þegar loksins kemur svo að ráninu sjálfu er ágætlega að því staðið en myndin nær samt ekki upp almennilegri spennu. Edward Norton skilar sínu hlutverki mjög vel og De Niro og Brando stóðu einnig fyrir sínu, en flest annað var lélegt.

Ágætis mynd en handritið greinilega verið fengið beint úr endurvinnslunni. Þrátt fyrir fína leikara sem reyndar fengu ekki mikið til að moða úr er þetta bara svona meðalmynd. Meðal leikara eru menn eins og Edward Norton sem mér finnst komast einna best frá þessari mynd, Robert De Niro, Angela Basset og svo Marlon Brando sem sannarlega má muna sinn fífil fegurri. Þetta er ekta klisjumynd, hvað hefur maður ekki séð margar svona SÍÐASTA eitthvað myndir þar sem menn eru að fara að hætta í hinu og þessu. En þetta er einmitt þannig mynd, en þessi fjallar um innbrotsþjóf sem ætlar að leggjast í helgan stein eftir síðasta stóra ránið. Þetta rán sem í fyrstu virkar sem leikur einn verður flóknara sem nær dregur ráninu........ Eins og ég sagði áður ekkert nýtt í þessari en í sjálfu sér ágætis ræma.

Þeir góðu leikarar Robert De Niro og Edward Norton, ásamt hinum góða leikstjóra Frank Oz ( sem gerði hina frábæru Bowfinger ) gátu ekki lífgað upp á þessa mynd. Hún olli mér sárum vonbrigðum því ég bjóst við traustri, vel gerðri og spennandi kvikmynd. Það sem ég fékk var formúlukennd, föl og litlaus eftirlíking að góðri spennumynd. Hún nær aldrei að lyfta sér upp á neitt almennilegt plan, heldur er í hálfgerðri ládeyðu allan tímann. Lognmolla liggur yfir leikurunum þar sem þeir fara þreytulegir með línurnar sínar, Marlon Brando þeirra verstur. Hann á bara að vera á eyjunni sinni og hætta að reyna að leika því hann getur það ekki lengur. Engar tengingar voru í myndinni sem hefði gert manni kleyft að skilja ástæður hegðunar persónanna, og því kom hið óvænta (ekki mjög óvænt) lokatvist alveg eins og skrattinn úr sauðaleggnum því engin fyrirvari eða tilgangur var með því. Reyndar skemmir þriðji hluti myndarinnar alveg það sem hafði gerst á undan, og skilur eftir súrt bragð í munninum. Það verður að flokka þessa mynd sem mistök hjá öllum aðilum þó hún sé á engan hátt hræðileg. Hún er bara ekki spennandi, og alls ekki það sem maður hefði búist við af þeim aðilum sem að myndinni standa.

Með leikara eins og Edward Norton og Robert DeNiro um borð er engin ástæða til annars en að gera háar væntingar til The Score. Það kemur því miður í ljós að hún hefur sama veikleika og óteljandi aðrar nýlegar myndir: slappt handrit. Myndin segir frá atvinnuþjófi sem er orðinn leiður á þessum lífstíl og vill gerast heiðarlegur en er dreginn inn í eitt síðasta rán hálfpartinn gegn vilja sínum. Annar yngri náungi sem er upprennandi þjófur er með honum í verkinu, en sá reynist ekki allur þar sem hann er séður. Sé myndin brotin niður atriði fyrir atriði er ekkert athugavert að finna þar sem leikframmistöður og leikstjórn eru með besta móti og sömuleiðis tæknivinnsla en sem heild er hún þó nokkuð brokkgeng. Keyrslan er með hægara móti og atburðarásin jaðrar við því að verða langdregin á köflum. Stærsti veikleikinn er endirinn, en hann er afar snubbóttur og það má segja að kreditlistinn komi á skjáinn upp úr þurru rétt þegar manni fannst hlutirnir vera farnir að verða áhugaverðir. Það er ekki þar með sagt að The Score sé slæm mynd - hún hefði bara getað verið svo miklu, miklu betri með þessu samansafni leikhæfileika.

The score kemur frá ólíklegasta leikstjóranum Frank Oz(muppets in space, in and out) sem sumir þekkja kannski frá brúðuleikurunum. Hann hefur ekki oft leikstýrt alvöru myndum og kom það mér óvart að þessi mynd væri frá þessum leikstjóra. The score fjallar um mann Max(Marlon Brando) sem ræður ungan strák sem leikinn er af Edvard Norton til þess að ræna ná upplýsingum um dýrmætan hlut sem geymdur er í tollhúsi. En til sjálfs verksins fær Max vin sinn Nick(Robert De Niro) til þess að ræna dýrgripnum. Svona er söguþráðurinn í stutt máli. Frank Oz hefur ekki haft tökin á leikurunum vegna þess að tveir stærstu leikarar samtímans leika í myndinni og svo Edvard Norton sem er á góðri leið með það sama. Það eru leikararnir sem skapa þessa mynd og gera hana góða. Þeir leika vel og gefa persónum sínum góð skil. Handritið er ekki samt upp á marga fiska fyrir hlé. Eftir hlé fer aðeins að hrærast upp í hlutunum. Hollywood lýsing og myndataka passar vel við myndina. Engin ný sjónarhorn. En þrátt fyrir nokkra galla þá gat maður alveg gleymt þeim, klárað poppið og skemmt sér vel yfir mynd sem á köflum fékk hárin á manni til þess að rísa.

Myndir eins og The Score eru orðnar sorglega fátíðar og því var virkilega gaman að sjá eina spennumynd sem treysti ekki eingöngu á tæknibrellur heldur góðan leik og skemmtilega fléttu. Myndin er frábærlega leikin enda skartar hún frábærum leikurum á borð við Edward Norton,Robert Deniro og Marlon Brando. Norton stelur senunni og sannar endanlega að hann er einhver besti leikari í Hollywood um þessar mundir. Þetta er fín tilbreyting frá brellumyndum og vonlausum unglingahrollvekjum. Frábær skemmtun og það verður gaman að sjá hvort Norton verður tilnefndur....

Hvernig náðu framleiðendur að smala saman þrjá af hæfileikaríkustu leikurum sinna kynslóða og einn fjári traustan leikstjóra í mynd sem stýrist af svona þurru og óspennandi handriti? Kannski sáu þeir bara tækifæri til að vinna saman og vildu frekar skemmta sér á meðan vélarnar voru ekki í gangi frekar en að búa til eitthvað sem gæti staðið undir þeim væntingum sem maður gerir til svona hóps.The Score er langt frá því að vera leiðinleg, og það er vissulega mjög gaman að horfa á Robert De Niro og Edward Norton, sem spila nokkuð vel á móti hvor öðrum. Brando hefur reyndar ekki gert neitt af miklu viti síðan... hvað? á áttunda áratugnum?! Úfff... hann er reyndar ekkert sérstakur hérna, og maður hálf vorkennir honum fyrir það hvað hann er áberandi latur. Ég las reyndar að hann hafi verið mjög ósáttur við leikstjórann og þar af leiðandi ákveðið að vera bara með leiðindi. En ég meina, halló! Á hann ekki að kallast fagmaður??Frank Oz hefur, annað en Brando, alltaf verið nokkuð virkur á ferli sínum. Hann hefur líka leikstýrt þrusugóðum myndum á borð við Little Shop of Horrors, Dirty Rotten Scoundrels og Bowfinger. Oz er hérna voða týndur eitthvað, enda þekktastur fyrir gamanmyndir, léttar og dökkar. Hann hefur það a.m.k. ekki í sér að sjá um spennumynd einfaldlega vegna þess að það er ENGIN spenna í þessari mynd. Hún bara skríður áfram og kemur sér hægt og rólega að efninu. Svo loks prófar myndin nýja hluti og kemur með "plot twist" nálægt lokum, en áhorfandinn er á þeim tímapunkti löngu búinn að átta sig á því. Ekki svalt.Handritið býður heldur ekki upp á neitt sérstaklega áhugavert, sem er svekkjandi þar sem einn handritshöfundurinn er Lem Dobbs, sem meðskrifaði Dark City (þá vanmetnu snilld). Það eru fáein góð samtöl hér til staðar en síðan er bara haugur af senum sem gera ekkert nema að byggja upp ránið sem er síðan alls ekki það áhugavert. Endirinn er síðan alveg út í hött, og hvernig hann spilast út er eins og eitthvað grín. Angela Bassett er síðan alveg úti á þekju í illa skrifuðu aukahlutverki sem virkar sem uppfylling svo það sé einhvern kvenmann að finna í allri myndinni.The Score er best séð í sjónvarpi þegar það er vont veður úti og ekkert betra að gera. Þetta er líka góð mynd til þess að horfa á með öðru auganu því hún er ofureinföld og flæðir á skjaldbökuhraða. Hún fær nokkur stig fyrir leikaranna og nokkrar ágætar senur, en þær verða gleymdar langt fyrir áramót.5/10

Ég byrja á því að segja að The Score hafi verið þokkaleg afþreying. Edward Norton er frábær leikari (hann var alveg stórgóður í American History X, Fight Club og Keeping the Faith) og mér fannst hann standa sig allra best, Robert gamli DeNiro var líka fínn sem innbrotsþjófurinn og aðalkarakter myndarinnar. Það kom mér á óvart að sjá Marlon Brando(The Godfather, Apocalypse Now) sem kom aðeins inn á milli atriða en sú sem fór mest í taugarnar á mér var Angela Bassett, sem átti eina kvennhlutverk myndarinnar. Trailerinn benti til að þessi mynd ætti að vera einhver stórglæpamynd en svo kom bara að því að hún var allt öðruvísi. The Score kom mér aðeins á óvart(sérstaklega í lokin) og ég mæli ágætlega með henni. Þetta er samt ENGIN hasarmynd. Norton er samt góður(eins og alltaf).